मेलाका(मलेसिया):= क्वालालम्पुरबाट मेलाका सेन्ट्रल बस टर्मिनलतर्फ आउँदै गरेको एउटा एक्सप्रेस बसमा विदेशी पुरुषले महिला यात्रुमाथि यौन दुर्व्यवहार गरेको आरोपमा पक्राउ परेका छन्।
घटनामा १९ वर्षीया विश्वविद्यालयकी छात्रा संलग्न छिन्। उनले प्रहरीमा दिएको उजुरीअनुसार, शुक्रबार आफ्नो कलेजबाट घर फर्कंदै गर्दा ३९ वर्षीय बंगलादेशी पुरुषसँग सँगैको सिटमा बसेकी थिइन्। यात्राका क्रममा उनी केहीबेर निदाइन्।
जब उनी ब्युँझिइन्, उनले कसैले दाहिने जांघ स्पर्श गरिरहेको अनुभूति गरिन्।छात्राले तुरुन्तै आरोपितलाई रोक्न चेतावनी दिइन्, तर उनले दुर्व्यवहार जारी राखेको बताइएको छ।
भिडियो प्रमाण
पीडितले मोबाइल फोनमा घटनाबारे १०० सेकेन्डको भिडियोमा रेकर्ड गरेकी छन्। उक्त भिडियोमा उनले अंग्रेजीमा भनिरहेको सुन्न सकिन्छ:
“मैले तिमीलाई धेरै पटक भनेँ — मलाई नछुनू भनेर। तर तिमी अझै पनि छुन छाडेको छैनौ!”
भिडियोमा ती पुरुषलाई आफ्नो बायाँ हात पीडितको जांघमा राखेको स्पष्ट देखिन्छ। पीडितले तुरुन्तै बस चालक र सहायक चालकलाई घटनाबारे जानकारी दिइन्। चालकले प्रहरीलाई खवर गरे।
सहायक चालकले जब ती पुरुषसँग सोधे, उनले “निद्रामा अनायासै छोएको” भन्दै माफी मागे। उनलाई बसको पछिल्लो सिटमा सारिएको थियो। तर बस मेलाका सेन्ट्रल टर्मिनलमा करिब बेलुकी ८ बजे पुग्नेबित्तिकै प्रहरीले उनलाई पक्राउ गर्यो।
प्रहरी अनुसन्धान जारी
मेलाका प्रहरी प्रमुख डिपुटी कमिश्नर दातुक जुल्कैरी मुख्तारले पक्राउ पुष्टि गर्दै मलेसियन कानुन उल्लंघन (Section 354, Penal Code) अन्तर्गत अनुसन्धान भइरहेको जानकारी दिए।
पहिले पनि यस्तै घटना
यस घटनाअघि मे २२ मा पनि यस्तै अर्को घटना भएको थियो, जहाँ २१ वर्षीया छात्रालाई पाकिस्तानी रेस्टुराँ सहयोगीले बुकित बेरुआङको अपार्टमेन्टको भर्याङमा यौन दुर्व्यवहार गरेको आरोप लागेको थियो।
मेलाका टेन्गाहका प्रहरी प्रमुख असिस्टेन्ट कमिश्नर क्रिस्टोफर पाटिका अनुसार, ३१ वर्षीय आरोपितलाई पीडितको उजुरीपछि एयर केरोह प्रहरी चौकीले गिरफ्तार गरेको थियो । – बर्नामा
